Tag: motherhood

BATANG 1000 (First 1000 Days)

SAFE MOTHERHOOD:  Ano ang ligtas na gamot para sa buntis?

safebirthclinic
wombstorydotcom
 

Image Source:  wombstory.com

 

Buntis ka ba at may iniindang karamdaman?  Alamin kung anong gamot ang ligtas para sa iyo at para kay baby. Siguraduhing walang negatibong epekto ang anumang iinumin, lalo na sa pagbubuo ng sanggol sa iyong sinapupunan.

Ilang mahahalagang paalala muna para sa mga buntis:

  1. Walang gamot ang 100% na ligtas. Ang gamot na ligtas para sa iba, ay maaaring hindi ligtas para sa iyo.  Kaya komunsulta muna sa iyong OB Gyne bago uminom ng kahit anong gamot kahit pa ito ay OTC o over-the-counter.
  2. Huwag sosobra sa rekomendadong dose o dami ng gamot.
  3. Hangga’t sa maaari ay huwag uminom ng kahit ano sa iyong FIRST TRIMESTER, dahil ito ay kritikal na panahon ng development ng sanggol sa sinapupunan. Ang pag-inom ng anumang gamot ay maaaring magkaroon ng epekto sa iyong sanggol.  Kung kinakailangan talaga, konsultahin at magpareseta sa iyong OB Gyne.
  4. Kung may prescription medicines na iniinom bago mabuntis, tanging ang iyong OB Gyne ang makapagsasabi kung ligtas ang patuloy na pag-inom nito habang ikaw ay buntis.

Para sa mga karaniwang karamdaman, narito ang mga generic na gamot na maaari para sa buntis:

Karamdaman Gamot
Allergy Antihistamines tulad ng mga sumusunod:  Chlorpheniramine (maaaring maging sanhi ng pagkaantok), Diphenhydramine (maaaring maging sanhi ng pagkaantok), Loratadine
Ubo at Trangkaso Guaifenesin (expectorant), Dextromethorphan (suppressant), Guaifenesin plus dextromethorphan, Cough drops, Vicks VapoRub

Warm salt/water gargle

Hindi ligtas ang mga sumusunod:

Mga gamot na may alcohol

Mga gamot na may decongestant na pseudoephedrine and phenylephrine, na maaaring makaapekto ng daloy ng dugo sa placenta.

Huwag rin uminom ng “SA” (sustained action) forms o “Multi-Symptom” forms ng mga gamot na ito.
Constipation Psyllium , Polycarbophil, Methylcellulose

Mga laxatives at pampalambot ng dumi (milk of magnesia)
Diarrhea Sa loob ng 24 oras, pagkatapos lang ng ika-12 na linggo ng pagbubuntis:
Loperamide, antidiarrheal medication
First Aid Oint­ment Bacitracin, Neosporin
Headache Acetaminophen / Paracetamol
Heartburn Antacids para sa heartburn

Simethicone para sa gas pains
Rashes Diphenhydramine

Hydrocortisone cream or ointment

Oatmeal bath
Yeast Infection at  Fungal Infection Clotrimazole, Miconazole, Terbinafine, Tioconazole, Butoconazole, Butenafine, Tolnaftate

TANDAAN:  Komunsulta muna sa iyong doktor o OB Gyne bago uminom ng anumang gamot.  Maging ang mga natural na gamot o supplements ay may mga nilalaman na maaaring makaapekto sa iyong baby, lalo na kapag sobra ang dami.

Para sa karagdagang impormasyon, maaaring magtanong sa mga doktor ng SafeBirth.

 

SOURCES:

http://www.webmd.com/women/pregnancy-medicine#1

https://www.babycenter.com/0_safe-medications-during-pregnancy_1486462.bc

BATANG 1000 (First 1000 Days)

#ITOANGSAFEMOTHERHOODSTORYKO: JUDY LANE PENILLA

safebirthclinic

IMG_1163

 

Mother:  Judy Lane Penilla

Edad: 27 years old

Bilang ng Anak:  Isa, 5 months old

Anak:  Rouie Lein Penilla

Birthday:  February 13, 2017

 

 

 

 

Q: Bakit ka sumali ng Batang 1000 Program at ano ang naging karanasan mo dito?

A:   Natutuwa talaga ako sa mga Nutrition Class namin.  Kasi ang mga first time nanay na katulad ko, natututong magluto.  Hindi lang basta-basta, dapat masustansya.  Bawal sa amin yung mga pampalasa na maraming preservatives.  Kasi hindi lang para sa amin iyon, para rin sa baby sa loob ng sinapupunan namin.

Bukod doon ang dami naming benefits, may libreng Obimin, may freebies pa minsan na magagamit namin – tulad ng gamit ng baby, higaan, bag.  Menos gastos na rin.  Masaya rin kasi nakakasalamuha kami ng ibang nanay.

Judy Lane 1

Si Mommy Judy Lane tuloy ang pagluluto sa Nutrition Class kasama si Baby Rouie

 

Q:  Ano ang naging epekto o resulta sa iyo ng pagsali sa programa?

A:  Para sa akin nakatulong talaga.  Hindi naman talaga ako pihikan sa pagkain pero palagay ko dahil masustansya ang mga niluluto namin, wala naman akong naramdamang mga sakit-sakit.  Paglabas rin ng baby ko, healthy siya.

Sa biyenan ko unang nalaman ang tungkol sa Exclusive Breastfeeding pero nung sinabi sa Batang 1000 ang mga benepisyo talagang nakumbinsi na akong gawin ito.  Ngayon ang tawag nila sa anak ko ay ‘Bochog’ tapos tinatanong nila kung ano ang gatas niya kasi ang lusog lusog talaga.  Sabi ko gatas ko lang talaga.  Kung ikukumpara rin siya sa ibang bata, hindi siya sakitin o sipunin.  Hindi rin ako nahihirapang alagaan siya.

 

Judy Lane collage

Ang Batang 1000 Nanay Club sama-samang nagluluto, kumakain at natututo ng tamang nutrisyon para kay baby

 

Q: Paano kayo nagtutulungan ng Batang 1000 Nanay Club?

A:  Isang beses kasi may isang bata na iyak ng iyak.  Inverted kasi ang utong ng nanay niya kaya nagpa-pump lang siya o bottle feeding.  E kaso bawal ang bote sa Health Center.  So nagkatanungan na kung sino ang puwede magbigay ng gatas.  Simula noon nagbabahagi ng kami ng gatas sa ibang nanay sa grupo, lalo na yung mga nahihirapang magkagatas.  Minsan busy yung ibang nanay, nagluluto, kaya yung anak nila papadedehin muna sa ibang nanay.  Talagang kumportable na kami sa isa’t isa at talagang  may tulungan.  Kapag may breastmilk donation sa Health Center kaming mga Batang 1000 Nanay Club ang tinatawag nila.  Sabi nga nila panalo ang gatas namin, kasi ang dami-dami naming naido-donate.  Flattered kami at natutuwa na nakakatulong kami sa ibang nanay lalo na ‘yung walang gatas, kasi mas healthy talaga para sa bata ang breastmilk

 

May Safe Motherhood Story ka ba na nais mong ibahagi?

Maaaring bisitahin ang aming Facebook page at i-message kami para ibahagi ang iyong karanasan.

Pregnancy Stories

#ITOANGSAFEMOTHERHOODSTORYKO: Michelle Carandang

safebirthclinic

Michelle collage

Mother:  Michelle Carandang

Edad:  24 years old

Bilang ng Anak:  Tatlo (3)

Baby:  Jillian Raine 

Birthday:  October 21, 2016

 

 

 

Q:  Ano ang naging karanasan mo sa una mong pagbubuntis at bakit mo sa bahay napiling manganak?

A:   Sa una kong baby noong 2012, wala talaga akong permanenteng midwife kung kanino ako nagpapa-check up.  Noong sinubukan ko magpa-check sa health center na may public lying in, naabutan ko ‘yung nanganganak.  Siyempre madugo, tapos iyak ng iyak ‘yung buntis.  Parang natakot ako, kasi parang binabalewala  siya.  Ayoko ng ganun.  Nagpa-check up ako sa iba-ibang lying in clinic, at wala pa ring permanenteng midwife.

Michelle collage 2
 

Ang panganay na si Jaden na pinanganak sa bahay ay 5 taong gulang na ngayon.

 

Biglaan ang pagle-labor ko, sumakit ang tiyan ko.  Kaya ayun sa bahay na ako inabutan.  Naisip ng nanay ko si Nanay Mryna (midwife).  Mahigit 30 na taon na ang pamilya ko sa Brgy. Culiat at siya ang nagpaanak sa nanay ko – lahat kaming apat na magkakapatid.  Kaya pinatawag naming siya sa bahay.  Nahirapan akong ilabas ang una kong baby, pero naging maayos naman.

Q:  Bakit ka lumipat sa SafeBirth Lying In Clinic para sa dalawa mong sumunod na anak?

A:  Dahil kampante na ako kay Nanay Myrna, sabi ko sa asawa ko gusto ko talaga sa kaniya manganak.  Nasa SafeBirth na pala siya, at doon ko nalaman na bawal na palang managanak sa bahay.  Buti na lang malapit ang SafeBirth sa bahay ng magulang ko, doon kasi ako nagste-stay kapag buntis ako.  Naging regular ang check up ko.  Kapag sobrang sakit ng tiyan ko madali lang tumawag ng OB.  Puwedeng pumunta doon, at madali lang ring makontak at matext si Nanay Myrna at ang staff.  Naaalagaan ako ng mabuti doon.

Nitong huli sa pangatlo kong anak, unang buwan pa lang dinugo na ako.  OB agad ang nag-alaga sa akin. Pinainom ako ng gamot hanggang sa naging okay na.  Hindi na ako dinudugo at okay na ang kapit ni baby matapos ang ilang buwan. Nagkaroon nan g clearance para sa normal na panganganak at okay nang si Nanay Myrna ang magpaanak sa akin.

Michelle 1
 

Ang 2 years old na si Jourdan habang nasa sinapupunan pa si Baby Jillian Raine

 

Q:  Paano mo makukumpara ang alaga sa SafeBirth kaysa noong sa bahay ka lang nanganak?

A:  Mas mabuti talaga kapag may lying in na nag-aalaga sa’yo.  Mahirap ang sitwayson kapag walang matatakbuhan na lying in.  Kahit nga sa iba na walang bayad, mahirap rin ang sitwasyon – mahaba ang pila, at parang hindi ka natututukan.  Siyempre kapag buntis ka gusto mo naaasikaso ka at natutukan.  Dito kumportable, at kahit maghintay ay naka-aircon ka.

Malaking bagay rin na tumatanggap sila ng PhilHealth.  Malaki ang bawas sa gastusin.  Nasa Php 500 lang ang binayad ko sa huling baby ko.

 

May Safe Motherhood Story ka ba na nais mong ibahagi?

Maaaring bisitahin ang aming Facebook page at i-message kami para ibahagi ang iyong karanasan.

BATANG 1000 (First 1000 Days), Pregnancy Stories

#ITOANGSAFEMOTHERHOODSTORYKO: DIANNE COYOCA

safebirthclinic

Dianne 1

 

Mother:  Dianne Coyoca

Edad: 24 years old

Bilang ng Anak:  Isa  

Baby:  Ken Caleb Coyoca

Birthday:  March 9, 2017

 

 

 

Q: Paano ka napasok sa Batang 1000 Program at bakit ka sumali dito?

A:   3 months akong buntis nang sabihan ako ni midwife Beng ng SafeBirth na magpa-member sa Batang 1000.  Nang araw din na ‘yon, binigyan ako ng orientation ng Batang 1000 Site Coordinator na si Becca.  Ito pala ay programa ng Quezon City Health Department kung saan aalagan ang unang 1000 na araw ni baby.  Simula sinapupunan hanggang 2 years old si baby ay aalagaan kami.

Mahalaga raw kasi ang unang 1000 na araw ng buhay ni baby.  Crucial raw sa development ni baby ang panahon na ito.  Kung magkukulang ng nutrisyon si baby sa panahong ito ay hindi na maihahabol.  Mahalaga raw ito para lumaki siyang malusog.

Batang 1000 collage
 

Batang 1000 Nanay Club:  Binabasa ni Dianne ang kaniyang sulat para sa anak na nasa sinapupunan pa.

 

Q:  Ano-ano ang mga benepisyo at natutunan mo sa Programang Batang 1000?

A:  Mayroon kaming libreng vitamins para sa buntis.  Pati ni vitamins ni baby ay kasama.  Nagkakaroon rin kami ng Nutritional Class kung saan nalalaman namin kung ano ang dapat kainin ng buntis, pati ni baby kapag 6 months pataas na siya.  Doon ko rin nalaman na magandang breastmilk lang ang dapat ipakain kay baby hanggang 6 months.  Walang tubig, walang ibang pagkain.  Exclusive breastfeeding lang, dahil kumpleto na ito.

Nalaman ko rin na ang ilang kasabihan ng matatanda ay hindi dapat gawin, tulad ng pagbibigkis na puwede palang makasama kay baby.  Hindi rin pala dapat naglalagay ng kung anu-ano sa balat ni baby tulad ng aceite de manzanilla dahil baka masunog ang balat nito.

Kamote
 

Healthy eating si Mommy Dianne

 

Q:  Bukod sa libreng vitamins at edukasyon, sa paanong paraan nakatulong ang Batang 1000 sa iyong pangananak?

A:  Nakabawas talaga ako sa gastusin.  Sa check-up pa lang, binigyan na kami ng malalaking discounts pagkatapos maubos ang Php 1,500 na benepisyo ng PhilHealth.  Pero nagulat kami sa baba ng binayaran namin sa panganganak ko.  Akala ko aabutin ng Php 4,000 hanggang Php 5,000 ang babayaran sa dami ng ginamit namin at sa serbisyo.  Dahil unang panganganak ko kinailangan magkaroon ng OB assistance.  Ang buong bill ko ay nasa Php 1,790 lang, kasama na ang midwife at assistance ng OB, lahat ng miscellaneous, mga gamot na kinailangan, hanggang sa Newborn Screening, Hepa B vaccine at Vitamin K ni baby.  Pati post-partum check-up ko ay libre, at ang Pedia check-up kay baby ay may discount.  Sulit na sulit talaga.

Ken 1
 

Batang 1000 Baby Ken Caleb

 

Q:  Ano ang iyong plano para patuloy na pangalagaan si baby Ken?

A:  Kahit bagong ina ako, hindi na ako takot alagaan si baby kahit mag-isa dahil nasa trabaho ang asawa ko.  Natuto ako ng practical tips tulad ng kung paano siya papaliguan.  Kailangan raw pala ay takpan ang tenga ni baby at magandang tip ito sa first time nanay tulad ko. Binigyan rin kami ng  booklet na guide sa pag-aalaga kay baby at naroon rin ang tamang schedule ng bakuna.  Dadalo ako sa mga Nutritional Class ng Batang 1000 linggo-linggo, at susundin ko ang pagpapa-check up kay baby hanggang mag-2 years old siya.

 

May Safe Motherhood Story ka ba na nais mong ibahagi?

Maaaring bisitahin ang aming Facebook page at i-message kami para ibahagi ang iyong karanasan.

Pregnancy Stories

#ITOANGSAFEMOTHERHOODSTORYKO: CRIZELLE CONSTANTINO

safebirthclinic

Cheng tummy 2

 

Mother:  Crizelle Constantino

Edad: 30 yo

Bilang ng Anak:  Dalawa (2)

Baby:  Caden Radney Martinez

Birthday:  March 9, 2017

 

 

Q: Ano ang naging karanasan mo sa iyong unang panganganak?

A:   Sa isang pribadong ospital sa Pampanga ako nanganak kay Freya.  Maliit lang siya kaya naging madali at normal ang aking panganganak.  Inabot ng mahigit Php 20,000 sa kabuuan ang binayaran ko sa ospital.

Binuhos ko ang alaga kay Freya at sinigurado ang breastfeeding sa loob ng unang taon. Dahil sa breastfeeding, hindi siya sakitin.  Nilalagnat lang siya kapag nagpapabakuna.  Hindi siya nagkakasakit dulot ng anumang impeksiyon.  Maaga rin siyang natutong maglakad.  Accelerated pa siya sa school, mula Kinder 1 ay Grade 1 na siya agad!

Cheng Freya
Ang panganay na si Freya Allure excited rin sa pagdating ni baby Caden Radney

Q:  Ano ang kaibahan ng pangalawa mong pagbubuntis?  Ano ang mga natutunan mo sa unang pagbubuntis?

A:  Galing sa Pampanga, taong 2011 lumipat kami ng Quezon City. Naghintay talaga ako ng limang taon para matutukan ng alaga si Freya.  Noong ipinagbuntis ko na ang pangalawang baby ko na si Caden Radney, siguristang ina pa rin ako.  Lagi akong nagva-vitamins at nagpapa-check up.  Kahit hindi iutos ng doktor lahat ng diagnostic at laboratory tests ginawa ko.  Dalawang beses pa ako nagpa- Biophysical Profile test para lang siguradong sigurado na okay ang development ni baby sa loob, kumpleto ang mga bahagi ng katawan niya hanggang sa kaniyang puso, internal organs, atbp.

Q:  Bakit ka lumipat sa private lying in at ano ang naging karanasan mo dito?

A:  Sabi-sabi ng mga kaibigan ko mas maalaga raw sa mga lying-in.  Nag-search ako sa internet at napunta ako sa SafeBirth website.  Nakita ko na parang ospital rin ito, maayos at malinis.   Tumawag ako at saka tumuloy sa SafeBirth Tatalon.

Natuwa naman ako dahil napaka-friendly, maalaga at maasikaso ng lahat ng staff.  Parang naging kaibigan ko na nga sila hanggang sa nanganak ako.  Tinetext ako ni midwife Chen at nurse Nette ng mga paalaala.  Kahit kalian puwede ko silang i-text o tawagan kung may kailangan akong ikonsulta at lagi silang available at mabilis magreply.

Kahit PhilHealth ay sila ang nag-asikaso.  Dahil gusto ko kumpleto, lahat ng bakuna at maging expanded New Born Screening ay kinuha ko, para lahat ng posibleng sakit na sakop nito ay masuri si Caden Radney.  Kumpara sa Php 20,000 sa ospital, umabot lang ng Php13,000 ang binayaran ko kasama na doon ang midwife at OB Gyne na nagpaanak sa akin, mga bakuna, Newborn Hearing at Expanded Newborn Screening.  Pati Birth Certificate sila na ang nag-asikaso! Kumpleto na.  Plano ko sa SafeBirth rin ipa-check sa Pedia ang anak ko.

Cheng collage
Si baby Caden Radney ang bagong blessing sa kanilang buhay

Q:  Ano ang tips ng isang siguristang nanay tulad mo sa ibang ina?

A:  Kung alam ko lang na maayos at walang hassle sa SafeBirth dun na ako dati pa.  Mas sulit at talagang alaga ka. Siguraduhin lang rin ng mga ina na kumpleto ang kanilang check-up, kumakain sila ng tamang pagkain tulad ng prutas at gulay, uminom ng vitamins, at okay ang kanilang midwife o doktor at siyempre ang lying in na pag-aanakan.  Tulad sa una kong anak, plano ko rin i-breastfeed si Caden Radney.  Ini-rerekomenda ko rin ito sa ibang ina.

 

May Safe Motherhood Story ka ba na nais mong ibahagi?

Maaaring bisitahin ang aming Facebook page at i-message kami para ibahagi ang iyong karanasan.

Pregnancy Stories

PAP SMEAR: MGA DAPAT TANDAAN

safebirthclinic

pap smear 2

Ang Pap smear test o Papanicolaou test ay ginagawa para malaman ang posibilidad na magka-cancer  ang cervix (o puwerta ng matris) ng isang babae.  Kung ang kondisyon ng cervix ay makikita ng maaga, ito ay maaring maagapan o magamot bago pa man lumubha.  Tandaan na walang sintomas ang cervical cancer sa umpisa.

cervical cancer

Mga Babaeng dapat magpa-Pap Smear:

girl pap

  1. Lahat ng babae na nag-umpisang makipagtalik ay dapat na regular na nagpapa-Pap Smear taon-taon.
  1. Rekomendado para sa lahat ng kababaihan edad 21 pataas.
  1. Maging ang mga babaeng nag-menopuase na o nagkaroon ng hysterectomy ay hinihikayat pa ring magpa-Pap Smear

 

Mahalagang Mga Paalaala Bago Isagawa ang Pap Smear:

  1. Dapat ay walang regla o menstrual period kapag pinagawa ito.  Pinaka mainam na isagawa ito 10-20 na araw bago at pagkatapos ng regla.
  1. Huwag makipagtalik 48 na oras bago isagawa ang Pap Smear.
  1. Dapat ay hindi maglagay ng kahit ano sa puwerta, gaya ng tampon, spermicides, vaginal foam, jellies, cream, wash, gamot, o kahit anong kemikal.

Ang lahat ng ito ay maaaring maka-apekto sa resulta ng Pap Smear

 

Mga Resulta:

Heart Pap

  1. Maaaring maging “normal” or “abnormal” ang resulta ng Pap Smear.
  1. Ang pagkakaroon ng abnormal na resulta ay hindi agad nangangahulugan na may cervical cancer ang isang babae.
  1. Para sa abnormal na resulta, dapat ay sumangguni sa espesyalista at magkaroon ng follow-up check-up at mga diagnostic tests ang babae para makumpirma ang estado ng cervix.

 

Tulad ng ibang cancer, ang cervical cancer ay maaaring maagapan kung makikita ito ng maaga.  Maging sigurista at magpa-check –up na!

 

SOURCES:

https://www.philcare.com.ph/5-things-to-know-before-taking-pap-smear/

https://www.verywell.com/your-first-pap-smear-what-to-expect-582026

http://www.akoaypilipino.eu/gabay/gabay/gabay/mga-dapat-malaman-tungkol-sa-pap-smear-o-papanicolaou-test.html

Pregnancy Stories

#ITOANGSAFEMOTHERHOODSTORYKO: ALONA GARAY

safebirthclinic

alona-3

 

Mother:  Alona Garay

Edad: 29 yo

Bilang ng Anak:  Apat (4)

Baby:  Maximilian Amaris Garay

Birthday:  November 30, 2016

 

 

Q: Ano ang naging karanasan mo sa pagbubuntis sa una mong tatlong anak?

A:   Masuwerte ako dahil hindi gaanong naging mahirap mga pagbubuntis ko. Nag-vitamins ako, folic acid, at gatas para sa buntis.  Sa iba’t ibang pampublikong ospital ako nanganak.  Medyo mahirap lang dahil sa dami ng tao at pasyente, hindi ka nila natututukan.  Tuwing prenatal check-up, halimbawa pupunta ka ng tanghali 1 pm.  Pero makakauwi ka 4 pm na.  Kapag nanganak ka lahat ng gamit bibilhin mo tulad ng gloves, etc.  Lahat iyon pipilahan mo pa, pati sa bayaran pila rin.  Kapag nanganak ka minsan ay tabi-tabi pa kayo ng kama ng ibang nanganak.  Ang daming tao at limitado ang privacy.

Q:  Paano ka napunta sa private lying in at bakit mo napagdesisyunan na dito manganak?

A:  Para sa pang-apat kong baby dapat ay sa isang maliit at pribadong ospital ako manganganak.  Doon na ako nagsimulang magpacheck up at sabi nila nasa Php 25,000 ang gagastusin ko sa panganganak, pero hindi aircon.

Naghanap ako sa Facebook ng lying in sa Quezon City at doon ko nakita ang Safebirth.  Nakita ko ang mga posts at pictures, naisip ko mukhang okay naman. Nabasa ko ang mga comments ng mga nanganak kaya naenganyo akong tumawag.  Ni-refer ako sa pinakamalapit na branch sa Tatalon.

alona-1
Tulad ng ibang ina, isang happy at healthy family ang pangarap ni Mommy Alona

Q:  Ano ang naging karanasan mo sa SafeBirth Lying In Clinic?

A:  Natuwa ako kasi mababait at approachable lahat ng staff, mula sa nurse, midwife at mga doktor.  Bilang ina, bibigyan ka rin nila ng choice kung gusto mo ay sa OB o midwife, basta hindi maselan ang pagbubuntis.  Dahil hindi naman maselan ang pagbubuntis ko midwife ang nagpaanak sa akin, na may OB assistance.  Akala nga namin nung una dahil malaki ang tiyan ko ay kailangan pumunta ospital at baka caesarean.  Pero dahil sa pagtutok ni Midwife Che at paggabay ni Dra. Cristobal nailabas ko ng normal si Baby Max.

Malaking bagay na kausap at katext ko lagi si Midwife Che.  Nung pumutok ang panubigan ko tinext ko lang siya na pupunta na ako ng clinic, at pagdating ko ay nandun na siya kasama ang ibang staff at nag-aabang. Sa pampublikong ospital hindi mo magagawa ‘yon.

alona-4
Happy and healthy SafeBirth Baby Max

Plano ko bumalik para magpa-pedia.  Maganda kasi magpapa-schedule lang at sigurado kang priority ka at hindi na kailangan maghintay nang matagal.  Kapag nakikita ko kasi ang sitwasyon sa center o sa ibang ospital, nagaalangan ako kasi minsan andun rin ang mga matatanda, may ubo at iba pang sakit, halo-halo na.  Naaawa ako sa mga nanay na matagal nakaupo at naghihintay.  Siyempre mas gusto kong safe ang baby ko at hindi rin nasasayang ang oras ko. Kung mababa kasi ang immune system ng baby mo at mahawa siya, doble pag-aalala at gastos pa.

Q:  Mairerekomenda mo ba ito sa ibang nanay na katulad mo?

A:  Sabi nga ng asawa ko kung alam lang namin na may SafeBirth noon, doon na lang sana kami dati pa.   Noong una ayaw pa niya dahil ‘lying in lang’ pero natuwa siya nang makita niya na maliit lang ito pero maayos at malinis, may aircon pa.  At home rin ang pakiramdam namin, parang hindi kami nahihiya.  Nakatutok ang alaga sa iyo at parang ikaw lang ang inaasikaso.

Noong nakaraang Nobyembre nirekomenda ko sa isa naming tenant na subukan sa SafeBirth.  Natuwa siya dahil Php 25 lang ang check-up at puwede pang gamitin ang PhilHealth!  Nitong January nanganak siya at maliit lang ang binayaran niya kumpara sa ospital. Hindi ako napahiya sa aking pag-rekomenda.

 

May Safe Motherhood Story ka ba na nais mong ibahagi?

Maaaring bisitahin ang aming Facebook page at i-message kami para ibahagi ang iyong karanasan.

 

Breastfeeding Stories

#ITOANGSAFEMOTHERHOODSTORYKO: NURSE TINA TATAD-GUBANTES

safebirthclinic

tina-1

 

Name: Cristina Tatad-Gubantes (Tina)

Trabaho: Nurse

Bilang ng taon sa trabaho:  4 years

Edad:  31 years old

Bilang ng anak: Isa (1)

Baby:  Krizana Anica Gubantes (2 years old)

 

 

Q:  Paano ka napasok sa pag-aalaga ng mga buntis at ano ang naging karanasan mo?  

A:  Nagsimula ako bilang nurse sa delivery room ng isang public hospital, mahigit isang taon ako doon.  Bilang nurse, nag-assist ako sa mga nagpapaanak na midwife at doktor.  Naging required din kami dumalo ng mga seminar para sa mga buntis, tulad ng breastfeeding at new born screening.  Isang taon akong tumigil dahil October 2014 noong ipinanganak ko si Baby Anica.  Tinutukan ko talaga ang pag-aalaga at  breastfeeding sa kaniya.  Pagbalik ko sa trabaho ay pumasok na ako sa SafeBirth Novaliches.

 

Q: Dahil sa iyong karanasan sa mga buntis at mga seminar, ano ang mga natutunan mo?  Nakatulong ba ito sa iyong pagiging ina?

tina-3
Isang taon nag-exclusive breastfeeding si Tina

A: Pakiramdam kasi ng ibang nanay mas tataba kung formula ang ipapainom.  Pero sa dami ng nanay at sanggol na nakasalamuha at na-interview ko, nakumpara ko ang pagkataba ng isang breastfed at hindi breastfed na baby.  Kadalasan mas siksik sa laman ang mga sanggol ng mga nagpapasuso.

Noong nanganak ako, kumbinsido akong mag-exclusively breastfeed ng isang taon.  May mga halos kasabayan rin akong nanganak noon, at sa paglipas ng panahon napansin ko na mas advanced ang development ng anak ko.  Apat na buwan siya nang makadapa, at nauna siyang matutong maglakad kaysa sa iba.  Mabilis niya ring natutunan ang mga salitang Mama at Papa.  Napansin kong napaka-takaw ng ibang baby sa formula milk, pero sakto lang kung dumede si Baby Anica.  Dahil rin sa Lactation Seminar sa SafeBirth, natutunan ko na maaari ko na siyang pakainin ng soft foods kapag 1 year old na siya.  Nagma-mash ako ng sayote, carrots, patatas at kaunting isda minsan.  Naging maganda ang pagtaas ng kaniyang timbang at lagi siyang masaya.

Ngayon kapag magkakasakit siya, pinapa-breastfeed ko siya at mabilis siyang gumagaling.  Sabi nga nila ay may antibiotics ang gatas ng ina.  Nakikita ko rin sa kaniya na may comfort siyang nakukuha kapag pinapasuso ko.

Q:  Bilang nurse sa SafeBirth paano mo ibinabahagi ang iyong kaalaman sa ibang buntis?

anica-collage-2
Mula noon hanggang ngayon, happy baby si Anica.

A:  Kinikuwento ko sa kanila ang mga karanasan ko.  Lahat ng natutunan sa breasfeeding seminar ay totoo pala.  Minsan kapag may mga pasyente na nagpapasuso at gumagamit ng formula, pinag-uusap ko sila tungkol sa kanilang mga karanasan.  Maganda dahil nakukumbinseng mag-breastfeed ang ibang mga gumagamit ng formula.  Hindi lahat, pero mas okay nang sumubok.

Mabilis kasi ma-discourage ang ibang ina.  Kailangan talagang tiyagain dahil masakit talaga at kung minsan ay magsusugat pa.  Alamin ang tamang posisyon, dahil makakatulong ito ng malaki sa inyong pagpapasuso.  Isipin na lang nila na ito ay para kay baby.  Isipin ang mga long-term na epekto.

May Safe Motherhood Story ka ba na nais mong ibahagi?

Maaaring bisitahin ang aming Facebook page at i-message kami para ibahagi ang iyong karanasan.

Breastfeeding Stories

#ITOANGSAFEMOTHERHOODSTORYKO: Grace Benaid

safebirthclinic

2

Mother:  Grace Benaid

Edad: 24 years old

Bilang ng Anak:  Isa

Baby:  Ania Sadie Abedes

Birthday:  January 12, 2017

 Q: Paano ka nahikayat na mag-attend ng Breastfeeding Seminar at anu-ano ang mga natutunan mo rito?

A:   Simula pa lang inimpluwensyahan na ako ng kapatid ng partner ko tungkol sa benefits ng exclusive breastfeeding.  Mas masustansiya ito, nagkakaroon ng mas malalim na bonding kay baby, at malaki ang matitipid.  Kung mamahaling formula ay aabutin ng limang libo sa isang buwan ang gagastusin sa gatas!

grace-collage
Habang hinihintay ang paglabas ni Baby Ania, dumalo ng Secrets to A Joyful Breastfeeding seminar si Mommy Grace

Nag-attend ako ng Secrets To A Joyful Breastfeeding ni Ms. Nona Andaya-Castillo (SafeBirth Seminar series).  Nalaman ko ang downside kapag formula; hindi talaga ito ang ‘best’ tulad ng breastfeeding.  Nagkaroon rin ng practical tips.  Marami raw kasing nanay ang nagaakala na wala silang gatas, pero ayon kay Nanay Nona maaaring mahirap lang itong palabasin sa umpisa. Mayroong gatas halos lahat ng ina at kailangan lang tiyagain.  Ito ang naalala ko noong nahirapan akong mag-breastfeed pagka-panganak.

Q:  Anong pagsubok ang kinaharap mo sa breastfeeding pagkapanganak?

A:  Noong unang dalawang araw ayaw talaga mag-latch ng baby ko.  Iyak lang siya ng iyak.  Naghalo na ang stress ko dahil sa sakit dahil caesarean ako plus ‘yung frustration na hindi ko siya mapadede.  Buti na lang suportado kami ng kapatid ng partner ko na nagbre-breastfeed rin.  Siya ang nagbibigay ng gatas kay baby noong una.  Ang kaso hindi naman siya laging available.

 

new
Mensahe ng pasasalamat ni Mommy Grace para kay Nanay Nona

Q:  Anong ginawa mo? May tips ba mula sa seminar na nakatulong sa iyong problema sa breastfeeding?

A:  Inalala ko ang tip ni Nanay Nona tungkol sa skin-to-skin contact.  Nakapatong lang sa akin si baby habang nakahiga.  Sabi kasi ay makakatulong itong magpakalma, dahil naririnig niya ang tibok ng puso ni nanay.  Nagkakaroon ng kaparehong environment dahil ‘yun rin daw ang naririnig niya habang nasa sinapupunan pa.

Muntik na akong  mag-give up at nagpapabili na ako ng formula milk noong pangalawang gabi.  Naiiyak na ako dahil alam kong gutom na gutom na siya.  Salamat na lang at nag-latch siya sa wakas!  Sobrang saya ko kasi kampante na ako na magagawa kong mag-exclusive breastfeeding.  Iyon talaga ang goal namin.

 

baby-2
Happy and healthy Baby Ania

Q:  Ano ang maipapayo mo sa first time mommies na katulad mo?

A:  Siyempre dahil first time mayroong fear of the unknown. Maghanda at pataasin ang kaalaman tungkol sa pagbubuntis. Maaaring mag-attend ng mga seminar mula sa mga eksperto.  Panay rin ang Google ko noon.  Maraming website ang nagbibigay ng advice, at may mga applications na makakatulong sa pagbubuntis.  Siguraduhin lang na iko-konsulta niyo rin sa inyong midwife o doktor ang mga nababasa niyo bago gawin para maging ligtas.

 

May Safe Motherhood Story ka ba na nais mong ibahagi?

Maaaring bisitahin ang aming Facebook page at i-message kami para ibahagi ang iyong karanasan.