child health – SafeBirth Clinic

Ang pangangalaga sa sarili habang nagbubuntis ay hindi natatapos sa pagpapatingin lamang sa mga medical providers (midwife o OBGyne). Kasama rin dito ang kumain ng tamang pagkain na may sapat na nutrisyon. Ito ay parte ng pangangalaga sa sarili at kay baby sa First 1000 days ninyo.

Importanteng kumain ng sapat at masustansyang pagkain dahil:

Sanhi ito ng nutrisyon para sa mental at pisikal na development ni baby
Maiiwasan ang sobrang timbang habang nagbubuntis
Maiiwasan ang gestational diabetes
Nagpupuno ito ng mga nawawalang sustansyang kinukuha ni baby

Ang Pinggang Pinoy ay ginawa ng Food and Nutrition Research Inc. (FNRI), isang gabay para sa mga buntis upang sila ay maturuan kung ano ang mga dapat kainin na may sapat na nutrisyon habang sila ay nagbubuntis.

pinggan-solo — IMAGE SOURCE: FOOD AND NUTRITION RESEARCH INSTITUTE

Para magabayan tayo mga mommy, maaring gamitin ang Pinggang Pinoy chart para masigurong tama at sapat ang ating kinakain. Makikita sa Pinggang Pinoy ang pagkakahati nito sa GO, GROW and GLOW foods.

Ayon sa FNRI, ang bawat nanay ay dapat kumakain ng GO, GROW and GLOW food upang maging malusog at maging matibay kayo ni baby.

Anu-ano nga ba ang GO, GROW and GLOW foods?

GO foods: Ang Go Foods ay mga pagkaing pampalakas at pampasigla. Ang mga pagkaing ito may carbohydrates na may mataas na fiber, bitamina at minerals na nagbibigya ng enerhiya.

Ang mga sumusunod ay mga halimbawa ng Go Foods:

Kanin
Tinapay
Kamote
Mais

GROW foods: Ang Grow Foods ay ang mga pagkaing mayaman sa protina na tumutulong sa pampatangkad, pampabuo ng katawan, pampalakas ng mga buto ni mommy at sa growth development ni baby.

Ang mga sumusunod naman ay ang mga halimbawa ng Grow Foods:

Itlog
Gatas
Lamang-dagat katulad ng isda at hipon
Keso
Meat katulad ng chicken, baka, baboy
Beans katulad ng garbanzos, mongo, taosi, atbp

GLOW foods: Ang Glow Foods ay mga pagkaing siksik sa nutrisyon at bitamina na panlaban sa sakit katulad ng mga gulay at prutas. Ang mga sumusunod ay mga halimbawa nito:

Pechay
Malunggay
Okra
Sitaw
Manga
Pinya
Kamatis

Simulan ang pagbuo ng magandang kinabukasan ni baby sa pagkain ng sapat at masusustansyang pagkain sa First 1000 days ninyo.

sample-meals — IMAGE SOURCE: FOOD AND NUTRITION RESEARCH INSTITUTE

Abangan ang iba pang First 1000 articles para sa maging malusog at matibay kayo ni baby.

Source:

http://www.fnri.dost.gov.ph/images/sources/PinggangPinoy-Pregnant-and-Lactating-Women.pdf

http://www.fnri.dost.gov.ph/index.php/tools-and-standard/nutritional-guide-pyramid#pregnant

http://www.medlineplus.gov/ency/patientsinstructions/000584.htm

https://www.reference.com/food/examples-grow-glow-foods-9fcf9bafd4151a15#

Breastfeeding Stories

Gatas ng Ina Bida sa Panahon ng Sakuna: Mga Tunay na Kwento

September 20, 2016February 15, 2018 safebirthclinic

Ang Barangay Tatalon sa Quezon City, kung saan tabi-tabi ang kabahayan ay hindi ligtas sa nakakapaminsalang pagbaha tuwing malakas ang ulan. Apektado ang maraming pamilya sa lugar pero hindi ito naging sagabal sa ekslusibong pagpapasuso ng ilang mga ina sa lugar. Gatas ng ina ang naging sandata nila laban sa pagkagutom at pagkakasakit ng kanilang mga sanggol sa panahon ng sakuna.

qc-flood-drill2-73114 — IMAGE SOURCE: www.rappler.com

First time mommy si Baby Jane Santos at dalawang buwan pa lamang ang kaniyang sanggol na si MJ nitong Agosto 2016. Dahil sa walang humpay na pag-ulan na dulot ng habagat, naging lagpas-tao ang baha sa lugar nila. Dala lamang ang damit na suot, kinailangan nilang mag-evacuate sa mas ligtas na lugar. Ang covered court ang nagsilbing tahanan nila sa loob ng mahigit dalawang araw. Tatlo pang ibang pamilya ang naging kahati ng pamilya ni Baby Jane sa kanilang espasyo sa basketball court. Simula pagkapanganak kay MJ ay ekslusibo niya itong pinasuso.

“Sabi nila mas mabuti magpadede dahil hindi nagiging sakitin ang bata at mabilis lumaki. Sa dalawang buwan, mabilis ang lumaki si MJ, naging mabigat at mataba,” ayon kay Baby Jane.

Sa kabila ng kanilang sitwasyon sa evacuation center hindi siya nahirapang pakainin ang anak. Habang sila ay umaasa sa limitadong relief goods, mabuti na lang at tuloy-tuloy ang kaniyang supply ng gatas. Dagdag pa ni Baby Jane, “Nakakatipid din po kami dahil hindi na kailangan bumili ng gatas. Diaper na lang ang kailangan pagkagastusan noong panahon na ‘yon.” Matapos ang malakas na ulan, sa kabila ng paglaganap ng sakit tulad ng ubo, sipon at diarrhea na karaniwang nangyayari sa panahon ng sakuna, nanatiling malusog ang sanggol na si MJ.

Maging ang tatlong anak ni Rosalie Romano na mula rin sa Barangay Tatalon ay hindi kailanman pinainom ng formula milk. Hindi naging hadlang ang ulan at bahang dulot ng habagat noong taong 2012 sa kaniyang pagpapasuso sa bunsong anak na si Eloisa Mae na ngayon ay apat na taong gulang na. “Sa kahirapan ng buhay ngayon, mas tipid ang pagpapasuso. Mas madali rin dahil hindi na kailangan magtimpla ng gatas at hindi pagising-gising sa gabi,” kuwento ni Rosalie.

Mahalaga ang nutrisyong nakukuha ng inang nagpapasuso. Ayon sa kaniya, “Kapag hindi maayos ang pagkain, kakaunti ang gatas. Maganda kung masustansya tulad ng isda, at gulay tulad ng malunggay at kalabasa.” Dahil limitado ang kanilang pagkain at lahat ng tindahan ay sarado, malaking tulong ang suporta ng kaniyang pamilya sa pamamagitan ng pagbibigay ng sapat na pagkain para patuloy na magkapagpasuso noong panahon ng kalamidad.

“Lahat ng anak ko malakas, at hindi pasaway. Hindi sila gaanong nagkakasakit at kung magkaroon man ay lagnat-lagnat lang,” pagmamalaki ni Rosalie. “Aanhin mo ang ibang gatas, kung mayroon ka naman. Mabuti na sa kalusugan, hindi pa nauubusan.”

BATANG 1000 (First 1000 Days)

Breastfeeding in the First 1000 Days: Puhunan para sa magandang kinabukasan

September 15, 2016February 15, 2018 safebirthclinic

Ang pangarap ng bawat magulang para sa kanilang anak ay maging malakas, malusog at matagumpay sa hinaharap. Ito ay lalong maisasakatuparan kung ang bawat nanay na magpapasuso sa kanilang anak lalo na sa loob ng First 1000 days nito.

Ang breastfeeding ay isang mahalagang hakbang sa loob ng First 1000 days ni baby. Sila ay mahalagang mabigyan ng sapat na nutrisyon na nagmumula sa gatas
ng ina para maabot nito ang kanyang potensiyal at
magkaroon ng magandang simula sa buhay.

Ayon sa mga pag-aaral, ang breastfeeding ay maraming benepisyo hindi lang sa nanay kundi pati sa sanggol na makatutulong sa ikatitibay ng kinabukasan nito. Ilan dito ay ang mga sumusunod:

1. Nagbibigay proteksyon laban sa sakit at impeksyon. Ang breast milk ay may colostrum na nagbibigay ng antibodies na nagsisilbing unang bakuna ng sanggol. Ang World Health Organization (WHO) ay inirerekomenda na magpasuso sa sanggol lalo na sa unang oras ng kanilang buhay.

2. Nagbibigay ng kumpletong nutrisyon. Ang breastmilk ay nagbibigay ng bitamina, mineral at enzymes na kailangan ng sanggol upang maging malusog. Bukod dito, ang breastmilk ay binubuo ng 88% na tubig na siyang nagbibigay ng sapat na fluid sa buong katawan. Ibig sabihin, hindi kailangang bigyan ng tubig ang baby lalo na sa unang anim na buwan nito.

3. Tumutulong sa pagpapatalino ng mga sanggol. Ang mga sanggol na breastfed ay lumalaking matalino at nagiging matagumpay sa buhay. Ang breastmilk ay may DHA (docasahexaenoic acid), lactose, good cholesterol, na tumutulong sa mental development ng bata. Bukod pa rito, ang mga bata ay nagkakaroon ng matibay na resistensya dahilan upang hindi lumiban sa klase at mapagbuti ang pag-aaral. Ayon sa pag-aaral, ang mga bata na pinasuso ng mas matagal ay higit pang magiging matalino at mas matagumpay. Kaya ang Department of Health (DOH) ay inirerekumenda na magpasuso ng higit pa sa 2 taon.

4. Makakaiwas sa mga komplikasyong pangkalusugan ang sanggol at nanay. Ang breastfeeding ay nagpapababa ng panganib ng pagkakaroon ng allergic diseases, asthma, obesity at type 2 diabetes. Ito ay makatutulong din sa mga nanay na maiwasan ang postpartum haemorrhage at mapababa ang tyansa sa pagkakaroon ng breast at ovarian cancer.

5. Makakatipid. Ang breastmilk ay libre kaya’t hindi kinakailangang bumili ng tsupon, bote at panglinis ng bote na ginagamit sa formula feeding. Makakatipid din ito sa oras dahil wala nang kinakailangang preparasyon ang mga nanay katulad ng pagtitimpla, paghuhugas, atbp. Bukod pa rito, maiiwasan ng mga nanay ang gastusing medical at kabawasan sa sweldo dahil sa pagliban sa trabaho dahil malayo sa sakit ang bata.

6. Makatutulong sa bonding ng mommy at baby. Ang breastfeeding ay makakatulong sa bond ni baby at ni mommy dahil sa skin-to-skin contact nito. Bukod pa rito, ang pagpapasuso ay naglalabas ng hormones na oxytocin o tinatawag na Happy Hormone upang gawing kalmado at relaxed si baby at mommy.

7. Nakakapagpababa ng timbang ng nanay. Ang breastfeeding ay nakakatulong na tunawin ang ekstrang calories sa katawan na maaring makatulong sa mabilisang pagpapapayat ni mommy.

8. Walang masamang epekto sa kalikasan. Ang breastfeeding ay hindi kinakailangan ng mga kagamitan o mga produkto na gumagawa ng kalat katulad ng lata at plastic. Sa pagpapasuso, nakakatulong pa ang pamilya sa kalikasan.

Ang pagpapasuso ay isang magandang puhunan para sa magandang kinabukasan ng mga sanggol, kung kaya’t hinihimok ng Department of Health ang mga nanay na magbreastfeed sa kani-kanilang anak lalo na sa First 1000 days nito upang maatim ang mga benepisyo nito.

Abangan ang iba pang susunod na First 1000 days articles na maaaring makatulong maging malusog at matibay ang inyong pamilya.

Sources:

http://www.who.int/nutrition/topics/exclusive_breastfeeding/en/

https://www.theguardian.com/lifeandstyle/2015/mar/18/brazil-longer-babies-breastfed-more-achieve-in-life-major-study

https://www.health.ny.gov/prevention/nutrition/wic/breastfeeding/importance.htm

http://www.askdrsears.com/topics/feeding-eating/breastfeeding/why-breast-is-best/breastfeeding-brain-development

http://www.askdrsears.com/topics/feeding-eating/breastfeeding/why-breast-is-best/7-ways-breastfeeding-benefits-mothers

http://www.ncbi.nlm.nih.gov/pmc/articles/PMC3753522/

https://www.nichd.nih.gov/health/topics/breastfeeding/conditioninfo/pages/benefits.aspx

http://www.womenshealth.gov/breastfeeding/breastfeeding-benefits.html

http://kellymom.com/nutrition/starting-solids/baby-water/

Breastfeeding Stories

Gatas ng Ina: Sagip-Buhay para sa mga Sanggol sa Panahon ng Kalamidad

September 6, 2016February 15, 2018 safebirthclinic

Ang Pilipinas ay hindi ligtas sa mga panganib na dulot ng bagyo, baha, lindol at tsunami. Ayon sa 2015 World Risk Index report ang Pilipinas ay pangatlo sa mga bansang pinaka malapit sa kalamidad sa buong mundo. Sa pagtataya ng PAGASA, ang nararanasan nating mga pag-ulan ay maaaring umabot hanggang Disyembre lalo na sa pagpasok ng naka-ambang La Niña.

Sa panahon ng sakuna, pinakamataas ang pagkakasakit at pagkamatay sa mga bata at sanggol. Mas bata ang edad, mas mataas ang panganib. Kung kaya ang mga sanggol na may edad anim na buwan pababa ang dapat bigyan ng pangangalaga. Kapag nakainom ang mga sanggol ng gatas na may kontaminadong tubig, o nakalagay sa maruming bote, maaari silang magkasakit ng diarrhea at mamatay sa loob lamang nang ilang oras.

Dito maaasahan ang kagalingan ng breast milk. Narito ang ilan sa mga dahilan kung bakit pinakamainam ang gatas ng ina sa panahon ng kalamidad:

Breast is best.

Ang gatas ng ina ang nagbibigay ng pinakamataas na proteksyon sa sanggol laban sa mga sakit, tulad ng respiratory diseases, pagtatae at malnutrisyon na maaring ikamatay ng sanggol. Pinalalakas ng gatas ng ina ang resistenya ng mga bagong panganak na sanggol upang mapanatili silang malusog.

Tandaan na sapat at angkop ang sustansya ng gatas ng ina para sa sanggol. Hindi matutumbasan ng formula milk ang sustansya at benepisyo nito.

Posible ang pagpapasuso sa kahit anong panahon.

Ito ay nananatiling ligtas ano man ang klima, tag-araw man o tag-ulan. Makakaiwas ang sanggol mula sa panganib ng pag-inom ng kontaminadong tubig na maaring idulot ng formula feeding. Hindi na nangangailangan ng ano pa mang kagamitan tulad ng bote at tsupon na maaaring magkaroon ng mikrobyo.

Ang pagpapasuso ay nabibigay-ginhawa sa ina at sanggol.

Dahil sa oxytocin o mas kilala sa tawag na happy hormone na aktibo sa katawan ng ina sa panahon ng pagpapasuso ay nagiging kalmado ang pakiramdaman ng nanay. Naibibigay din ito ng pisyologikal at emosyonal na pangangailangan ng sanggol. Nararamdaman niya na patuloy siyang inaaruga at minamahal ng mga tao sa kaniyang paligid. Nababawasan ang tensyon at stress na nararamdaman ng mag-ina sa kapag nakakaranas ng sakuna.

Ito ay hindi nakapipinsala sa ating kapaligiran.

Dahil hindi kailangan ng gamit tulad ng bote at tsupon, nakakaiwas tayo sa lalong pagpapalala ng kalagayan ng ating kapaligiran na nagdudulot ng climate change hazards. Wala itong iniaambag sa pagkasira ng ating kalikasan na dulot ng mga basura tulad ng plastik, bote, karton at foil. Hindi rin ito lumilikha ng polusyon na karaniwang nililikha ng paggawa ng formula milk.

Ang pagpapasuso ay LIBRE, ANGKOP, SAPAT at LIGTAS. Sa katunayan, hindi lang ito pagkain bagkus ay nagsisilbing gamot at proteksyon para sa mga sanggol. ‘Di matatawaran ang benepisyo nito hindi lang para sa ina at sanggol, kung hindi para sa buong komunidad.

Sa panahon ng disaster kung saan libo-libong biktima ang nangangailangan ng tulong mula sa gobyerno o ibang institusyon para tugunan ang pangangailangan sa pagkain at gamot, siguradong maasahan ang natural na biyaya ng gatas ng ina. ###

Sources:

http://www.nnc.gov.ph/39-featured-articles/1636-action-against-hunger-urges-pres-duterte-to-drive-change-on-development-issues-in-the-philippines

http://www.gmanetwork.com/news/story/323652/lifestyle/healthandwellness/unicef-mothers-should-continue-to-breastfeed-in-disasters-emergencies

http://www.who.int/mediacentre/news/releases/2013/philippines-breastfeeding-20131128/en/

Uncategorized

Secrets to a Joyful Breastfeeding Event Highlights

August 30, 2016February 15, 2018 safebirthclinic

Sa pagdiriwang ng Breastfeeding Month, ang SafeBirth ay nagkaroon ng seminar noong August 27, 2016 sa UP Hotel sa Quezon City. Ito ay dinaluhan ng mga first time mommies, mga nanay na nais pang matuto sa tamang pagpapasuso at ng mga supportive tatay. Ang seminar na “Secrets to a Joyful Breastfeeding” ay pinangunahan ng mahusay na breastfeeding advocate na si Ms. Nona Andaya-Castillo. Sa seminar na ito ang mga nanay ay natutunan ang mga sumusunod:

Proper latching
Proper breastfeeding position
Babywearing
Do’s and don’ts of breastfeeding
Ways to increase breastmilk
Lactation massage
Support system from the family

Naging masaya ang buong seminar dahil bukod sa kaalaman sa pagpapasuso, nakatanggap din ang mga dumalo ng mga papremyo at giveaways mula sa SafeBirth.

Ang Secrets to a Joyful Breastfeeding ay una lamang sa seminar series ng SafeBirth na may layuning makatulong sa mga nanay na maalagaan ang kani-kanilang pamilya.